曾於2006年參選港姐的阮兒（Chloe）憑着一身古銅色肌膚，再加上33.5C驕人身材及陽光面孔，輕易成為新一代女神。於荷蘭成長的Chloe，不甘生活平淡，早在18歲「卜卜脆」階段選擇參選香港小姐，雖然過程中沒有得到任何獎項，但卻能滿足其好奇心，落選後的她沒有返家鄉荷蘭，反而加入無綫藝員訓練班，一嘗當演員滋味。
力不從心
於短短半年的訓練班課程，頭三個月每日過着早10晚6的學生生活，當中讓Chloe最有得着的並非演技，而是與同學建立了真正的友誼，她謂：「開頭唔係鍾意演戲，細個覺得有嘢學同玩咪試吓囉！但去到20幾歲時，就覺得要努力啲，玩嘅心態轉變成真係想當係職業，但愈做愈難，同以前想像唔一樣。」久而久之，令Chloe發現事事力不從心，事業不順利，又不知道自己想做甚麼，不時反問自己差在哪裏，故毅然決定離開無綫。
跳出無綫的Chloe轉戰當跳唱歌手，惟過了兩年歌手生涯便因公司結業而結束，此舉亦令Chloe發現機會很難得到，她說：「原來無綫係咁好，但以前會覺得冇機會又學唔到嘢，出走之後先知樹大好遮蔭，咁咪邊度跌到邊度起番身，從後就對每樣嘢好認真，依家仲鍾意埋添！」
感激觀眾接受
談到《愛．回家》的演出，阮兒直言很難忘，她謂：「好多謝套劇，拍咗有兩年，中途加入，觀眾都接受，出街會叫我劇入面名，之後拍《殭》都好好，以前曾經去荷蘭讀書，今次去荷蘭工作，可能因為原因唔同咗，有衣錦還鄉嘅感覺。」
